عن الفريق

إحنا مين؟

إحنا فريق من طلاب الجامعات, جمعتنا فكرة واحدة وهي مساعدة طلاب المرحلة الثانوية, ومش من كلية أو جامعة واحدة لأ من جامعات مختلفة وكليات متنوعة.

مكاننا فين؟

حاليًا موجودين في القاهرة، ملناش مقر لكن بنسعى إننا نكون متسجلين تبع جامعة.

بدأنا إزاي؟

إحنا اتجمعنا عن طريق بوست صغير كتبه "عمر طاهر سعد" عشان يشوف مين حابب يساعد طلبة ثانوي, اتجمعنا كلنا وقررنا إننا نعمل الصفحة يوم 20-8-2015 ونكون في خدمة الطلبة.

بنعمل إيه؟

بنساعدهم بجزئين: نصايح، وشرح المناهج.

بننصحهم عن طريق أكتر حاجة بيستخدموها الفترة دي وهي الإنترنت, بنوصلهم عن طريق الموقع بتاعنا وصفحة الفيسبوك وبنوجهلهم نصايح عن كل حاجة ممكن يحتاجوها زي مذاكرة كل مادة بتكون إزاي وتنظيم الوقت والنوم والأكل والترفية والمشاكل الشخصية اللي أي حد فيهم بيواجهها وكمان بنقدملهم دعم نفسي لو حد فيهم محبط أو متضايق أو حتى مش عارف يذاكر من غير سبب واضح وبنحاول نكون أخواتهم الكبار اللي مشايين معاهم خطوة بخطوة. مش بس كده, إحنا كمان بنعمل فعاليات وإيفينتات نحمسهم فيها ونساعدهم أكتر, ونقابلهم وجهًا لوجه عشان يكلمونا براحتهم أكتر.

مؤخرًا كمان بدأنا حاجة جديدة وهي إننا نشرحلهم المناهج كلها، ونساعدهم ضد جشع بعض المدرسين، ومعانا مئات المتطوعين اللي مستعدين يشرحوا في أكتر من محافظة، فبنرتبلهم إن بدايةَ من دفعة 2021 هيكون في شرح للمناهج متاح على النت وعلى أرض الواقع، وبأسلوب هيفهمهم مش يحفظهم كلام وخلاص.